نظام المشاركات | النظام الخطي

05-08-2009 09:53 AM

مصطلح ويب 2.0 انتشر بشكل كبير في الفترة الاخيرة واصبحنا بنسمعه كتير و بنسمع عن اهميته وضرورة معرفته و مطابقة المواقع على اساسياته في الاول انا هوضح المقصود بمصطلح ويب 2.0 قبل ما نتكلم عن تاريخ و نشأة المصطلح ده، عايزين نفهم المقصود بمصطلح ويب 2.0 و هو ببساطة استخدام مجموعة من التقنيات الحديثة في صناعة المواقع لخلق تفاعل بين الموقع و المستخدم واللي بيتيح للمستخدم وضع و اضافة و نشر بيانات في صور محتلفة مع وجود امكانية تعرف الموقع على بعض خصائص المستخدم و ووضعها في الحسبان، يعني الموقع بيكون ذكي و بيتعرف بشكل كبير على مستخدميه.

وده بيحتلف بشكل كبير عن المواقع القديمة او اللي مش بستخدم التقنيات الحديثة او مواقع ويب 1.0 حسب ما سماها البعض، لان المواقع دي كانت مجرد صفحات ثابته فيها معلومات بتتجدد كل فترة عن طريق صاحب الموقع دون اي دور من المستخدم فالموقع كان بيشبه الجرنال، كمان مصطلح الويب 2.0 بيهتم بشكل كبير بالمعلومات او محتوى الموقع بشكل عام و مدى جودته و الاقبال عليه و تجديده باستمرار ومدى مشاركت الزوار او الاعضاء فيه.
كمان المفهوم ده بيهتم بمطابقة الموقع للمواصفات القياسية و اللي وضعتها منظمة W3 واللي بتتعلق بالتكويد السليم للموقع.
وهوضح اهم التقنيات و اللغات المتعلقة بمفهوم ويب 2.0 على سبيل المثال لا الحصر:-

لغة CSS:
وهي لغة التنسيق الاساسية و اللي بتتميز بالقوة و المرونة و القدرة على التفاعل مع لفات الويب الاخرى زي الجافاسكربت ولفات السيرفرسيد، فدلوقتي بيتم تنسيق و تقسيم الصفحات بالاعتماد عليها فقط و معدش ينفع نرجع نستخدم اكواد HTML في التنسيق او معدش ينفع برضه اننا نقسم الصفحة بالفوتوشب و نكودها بالفرونت بيج او اننا نعمل جداول و نخليها هي الوحدة الاساسية في تقسيم الصفحة، دي طرق نهاها مفهوم الويب 2.0 .

لغة J
لغة اساسية جدا و صعب نلاقي موقع حاليا مش بيستخدمها، الجافاسكربت بتتيح الديناميكية و الحركة في الموقع و كمان بتعتبر العصب لتقنيات تانية مهمة زي DHTML و Ajax واللي اصبحوا ضروريات للموقع الحديث الديناميكي.

لغات جهة السيرفر(PHP,ASP.NET,JSP,Perl):
استخدام احد لغات جهة السيرفر server side و ربطها بقواعد بيانات الموقع ضروري جدا عشان نتيح للمستخدمين التفاعل مع الموقع و ووضع ارائهم و مشاركتهم و ما الى ذلك، وده مينفعش يتم غير باستخدام احد هذه اللغات و انشاء قاعدة بيانات للموقع، ويفضل استخدام PHP ومع نظام ادراة قواعد البيانات MySQL

تقنية الاجاكس Ajax:
من اهم اساسيات الويب 2.0 و صعب نقول على موقع انه من مواقع ويب 2.0 دون استخدامه للاجاكس، وظهور الاجاكس كان من اقوى اسباب ظهور مصطلح ويب 2.0 لان الاجاكس عمل نقلة كبيرة في تطوير المواقع وبقى متاح اننا نقدر نجيب بيانات من السيرفر واحنا في نفس الصفحة و من غير مل يحصل لود او اعادة تحميل للصفحة.
طبعا الاجاكس موضوع كبير و هيكون له موضوع مخصص ليه قريب ان شاء الله

بعض تقنيات لغة XML:
لغة XML من اللغات اللي دخلت عالم الويب قريب و اهم اضافاتها للويب هو الاصدار الاقوى من ال HTML واللي هو XHTML
وبعدها بدأت تضيف تقنيات بتستخدم في المواقع و اعتبرت من تقنيات الويب 2.0 زي RSS واللي بنشوفها في مواقع و منتديات كتير و اللي بتساعد الزورا على الاطلاع على خلاصة الموقع و اخباره الجديدة.

هنتلكم دلوقتي عن تاريخ ظهور مصطلح ويب 2.0 و اللي بعتبر جزء مش مهم بقدر الكلام اللي فات لكن يكون كويس لو نعرف فكره عنه، المصطلح ده ظهر عام 2003 في مؤتمر من المؤتمرات الخاصة بعالم المواقع عن طريق فريق عمل شكرة اورالي O’Reilly اللي بتعد من اكبر الشركات و بتضم عدد كبير من خبراء تصممي و تطوير المواقع.
وكان غرضهم من المصطلح ده التفريق بين المواقع الديناميكية التفاعلية اللي بتستخدم التقنيات السابق ذكرها و بين المواقع الثابته الروتينية اللي مش بتتيح اي تفاعل مع المستخدمين و اللي كانت بتستخدم الطرق القديمة في التصميم و التطوير.

واحب اقول ان امثلة المواقع اللي بتنتمي للويب 2.0 او بتتفق معاه كتير جدا ولا يمكن حصرها لان ببساطة اي موقع بيتيح تفاعل الزوار و الاعضاء ومشاركتهم وبيحتوي على محتوى متجدد وبيتسخدم التقنيات الحديثة السابق ذكرها يبقى نقدر نصنفه من مواقع الويب 2.0، وللاسف البعض بيعتقد ان فقط Wikipedia و Blogs هما اللي بيصنفوا ضمن الويب 2.0 لمثرة ربطهم بالمصطلح ده لكن الكلام ده مش صحيح لان اي موقع بينطبق عليه الكلام اللي قولناه بيتصنف كموقع web 2.0 .

وعلى سبيل المثال موقع منتدى الديفيدي بيصنف كموقع ويب 2.0 واعتقد لو فكرنا هنلاقي ان الكلام ده واضح لان التقنيات المذكورة مستخدمة و بتستخدم "ممكن باستثناء RSS ولكنها غير اساسية" و تفاعل المستخدمين او الاعضاء ومساهمتم واضح جدا و على اعلى مستوى و طبعا محتوى الموقع بيتجدد بشكل سريع جدا.

وفي النهاية اتمنى يكون الموضوع انهى الغموض اللي كان متعلق بمفهوم ويب 2.0 ويكون افاد الجميع.
والموضوع ده اهداء مني لاعضاء منتدى الديفيدي بمناسبة تعييني مشرف على قسم تطوير المواقع وياريت محدش ينقل الموضوع لاي منتدى اخر الا بعد ذكر المصدر لان الموضوع اخد مني وقت و جهد و بأمانة مفيش اي منتدى عربي فيه موضوع بيتكلم عن web 2.0 بالشكل ده.

__________________

الحقوق

حقوق المشاركة محفوظة لـمنتديات الوَحش و لكاتبها hamouda367
الموضوع موجود فى منتدى تصميم و تطوير المواقع
أرشيف منتديات الوَحش . أرشيف منتدى تصميم و تطوير المواقع

التوقيع

ramdan kareem

نظام المشاركات \| النظام الخطي تعرف ببساطة على مفهوم Web 2.0
الكاتب	الموضوع